شرۆڤەکاری چایخانە
بەپێنوسی ( ئــۆرهــان کــایــا )
داوای چایەکی ڕەشم کرد ، تاڵ ، وەک تاڵی ژیان لەم وڵاتەی تێدا دەژیم ، تاڵ وەک ئاییندەی نەوەکانمان ، وەک ئایندەی دەرچوانی زانکۆ ، تاڵ وەک کەمی باران ، تاڵ وەک ڕوخساری سیاسیەکانی ئەم نیشتیمانە ، تاڵ وەک بڕوانامە تەزویرەکان ، وەک بن دیوار و پلەی ساختە .
تاڵ تاڵ وەک ئەو مێشکانەی بیر ناکەنەوە ، تاڵ وەک ئەو کچانەی لەنێو سۆشیال میدیا فریودراون ،
تاڵ وەک تاڵی ئەو کوڕەی چەند مانگە لەگەڵ کچێک لەسۆشیال میدیا نامە ئەگۆڕێتەوە دواتر دەر ئەکەوێت کوڕە …!
بەردەوام بووم لەخواردنەوەی چاکە و گوێم گرتبوو …
ئەو هەموو شرۆڤەکار و بیر مەندەی نێو ئەو چاخانە ، ئەو هەمووە سیاسی و پسپۆڕە چا ئەخۆنەوە ، تۆ بڵێیت
من لە شاری نیۆیۆرک نەبم …!
لەو چاخانە باسی وەرزش بکە ، هەمووان شڕۆڤەکار و پیشەگەر و وەرزشکارن ، گوێم لێبوو یەکێک ئەی وت من سەرۆکی ماشستەر بم ڕۆناڵدۆ ئەفرۆشم …!
یەکێکی دیکە وتی : ڕۆناڵدۆ جوان نەبوایە یاریان پێ نەئەکرد …!
یەکێکی دیکە وتی : تۆپی پێ واتە رۆناڵدۆ و میسی ، ئەم هەموو پسپۆڕە ، ئەی باشە بۆ تا ئێستا بەم شێوە ئەژین …؟
گەنجێک وتی : چاییەکەتان زۆر بێتامە ، ئەم قسە بێتام بوو وەک بێتامی ئەوانەی لەهەموو قاپێکدا کەوچکن .
کەسێک وتی : دوێنێ لەگەشت هەژدە شیش گۆشتم خواردووە ، ئەم قسەیە تاڵ بوو وەک تاڵی ئەو مناڵانەی باوکیان توانای کڕینی گۆشتی نیە .
گەنجێک وتی : کوردستان بدەن بەدەست منەوە وەک خواردنەوەی ئەم چا کێشەکان چارەسەر ئەکەم …!
هەبوو ( پێنج )خانوی هەبوو لەگەڵ (سێ ) ئۆتۆمبێل بەڵام ئەقڵی خاڵی بوو لە مەعریفە ، قسەکانی تاڵ بوون وەک تاڵی ئەو باوکەی ئێوارە ئەڕواتەوە بەدەستی بەتاڵ و گیرفانی بەتاڵ و سبەی سەری مانگە و کاتی کرێی خانووەکەیەتی و منداڵەکەی داوای پاسکیل ئەکات بۆ پشووی هاوین .
پیاوێکی بەساڵاچوو هاتە ژورەوە و فەرمووی ( سلام علیکم )
باوەڕم پێبکەن کەس نەیوت بەخێر بێیت تا چومە پەنایەوە و وتم : بەخێر بێیت ، موناقەشەی شرۆڤەکاران نەی هێشت کەس گوێی لەسڵاوی ئەو پیاوە بێت …!
لەو چاخانە باسی هەرچی بکەیت پڕیەتی لەپسپۆڕ و شرۆڤەکار ، پسپۆڕی خۆراک و سیاسی و رۆژنامەنووس و بیرمەند و دەیان کەسی بلیمەت …!
تەنانەت باسی تەندرووستی بکەیت کەسێکت لێ پەیا ئەبێت وەک پسپۆڕی ڕێکخراوی تەندرووستی جیهانی ئەدوێت …!
دوو لەو کەسانە سەرقاڵی ستایل و فاشیۆن و جل و بەرگ بوون ، هیچ کام لەوانە نەیان توانیوە تەنها یەک ساڵ بەجددی کار بکەن …!
ئەم هەموو بلیمەتە هەیە ئەی بۆ ژیانمان ناگۆڕدرێت …؟
ئەم هەموو فەیلەسوف و شرۆڤەکارە بوونیان هەیە من تێناگەم ئەم نیشتیمانە بۆ بەردەوام بۆ دوا ئەگەڕێتەوە …؟
بڕوام پێبکەن شڕۆڤەکاری میلۆدی و گۆرانی لێبوو …!
ئەو هەموو قسە پڕ و پوچ و بێ مانایە ، سوکایەتی کردن بەخاوەن پێداویستی تایبەت و قسە کردن لەو شتانەی پەیوەست نین بەژیانتەوە …
گەنجان و لاوان ئاییندەی ئەم نیشتیمانەن ،
ئەم گەنج و لاوانە ئاییندە بەکوێ ئەگەیەنن …؟
خوای مەزن ئەفەرموێت : شتێک شارەزایت تێدا نیە قسەی تێدا مەکە .
وَلا تَقْفُ مَا لَيْسَ لَكَ بِهِ عِلْمٌ إِنَّ السَّمْعَ وَالْبَصَرَ وَالْفُؤَادَ كُلُّ أُوْلَئِكَ كَانَ عَنْهُ مَسْئُولًا [الإسراء:36]
بیر کردنەوە ئاییندەت ئەگۆڕێت بۆ باشتر ،
مرۆڤی ژیر کەمتر قسە ئەکات و گوێ ئەگرێت ،
بیر ئەکاتەوە پاشان قسە ئەکات …
