پایز و گەنج
گەنج سامانێکی بەنرخی هەر نیشتیمانێکە، بەنرختر لەزیوو زێڕ، لەنەوت و مەرزەکان، دڕو مەرجانەو وەک شەمع شەوانی دەیجوری نیشتیمانەکان ڕووناک دەکەنەوە، وەک درەختەکان هەناسە تەنگی خاک سارێژ دەکەن، زێرەڤان و شوراو قەڵای نیشتیمانن، هەر گەنجە شۆڕشەکانی فەڕەنسی و بەهاری عەرەبی تاودەدەن و گۆڕانکاری گەورە دەهێنێتە ئاراوە، ئەوە گەنجان بوون هندستانیان لەمستعمری بەریتانی پاک کردەوە، مەگەر گەنجانی زانکۆی سلێمانی نەبوون وەک چقڵ بەچاوی بەعسییە شۆڤیەنیەکاندا دەچوون؟
گەنج وەک درەختێکی کێوی وشک بوو دەکرێ نەسایەی هەبێت و نەبەرهەم، دەکرێ بخەسێنرێت، کەڕو کاس بێت، بێ ئاگاو ناهۆشیار، عەقڵ نابیناو زمان گیربێت، خەم و هەمی تەنها لەتێرکردنی حەزەکانی ببینێتەوە، سک لەلایەک غەرەزی جنسی و سۆزداری بەشە گەورەکەی دیکەی.
دوێنێی ڕۆژێکی پایز لەڤیستیڤاڵی هەنار کە سەراپای کەیف خۆشی بوو بۆ گەنجان، بۆ کاسبکاران سەرچاوەیەکی داهات و بۆ هەڵەبجەی شاری شەهیدان سەروەری، گەنجان جمەیان دەهات، وەک کورد دەڵێ دەرزیت هەڵدایە بێشک لەسەری گەنجێک دەچەقی، ژمارەی گەنج چەند هێندەی تەمەنەکانی تر بوون، ئاخر ئەو جۆرە چالاکییانە مەکانێکی لەبارە بۆ تەراتێنی گەنجانێک کە بیری شەوو ڕۆژیان لەلای تێرکردنی حەزەکانیانە.
هەر سبەینێی پایز پێشانگای کتێبە، داخی بەجەرگم بۆ نەبوونی دڵسۆزێک کە ڕێژەی بەشداری گەنجانمان بەدرووستی بۆ دەربخات، ئەوجا بۆ هەموولا وەک شەبەق دەردەکەوێ چ میللەتێکی خەواڵ و کش و ماتین، چ بونەوەرێکی حەزپەرستین، چ کائینێکی سەمەرە لەم خاکەی کوردان هەناسە دەدات، پاش نالی و ناری و بێسارانی و مەحوی کێ لەنێو ئەم خاکە دەژی.
هەر سبەینێی کتێب دەیان دەرگا واڵا دەکرێت، ڕیکلام شاشەی سمارت فۆنەکانمان دەتەنێت، پاسەکان ئاڵوواڵا دەکرێن، تا دەرکەی حەوشەکەشمان دێن و دەمانهێننەوە، کتێبخانەکان دەیان گەوهەری گرن بەها (کتێب) نمایش دەکەن، سەدان دەزگای گەورە لەچاوەڕوانی گەنجانی نیشتیمانن، ئەمما کەمترین گەنج لەوێ سەریان نەوی دەکەن بەسەر کتێبەکانی پێشانگادا، لەوێ کتێبەکان بەهاتنی گەنجان مانا دەگرن، وەلێ ژماردنی گەنجان ئاسانترین کاری ئەو پێشانگایە.
شۆڕشی فکری کاتێک دەکرێت، لاوی خوێنگەرمی نیشتیمان تەقەلای سک و حەزەکانی پاشتر بخات، بەدخۆراکی فکری گەشە پێبدات و وەپێش بخات، هیڤیدارم گەنجان هۆشمەند بن و هاووێنەی بەشدارییان لە چالاکییە تەرفیهییەکان، لەو نیشتیمانە بچوکەی کتێبدا جمەیان بێت.
هێمن محمد وەرمنی
