وەزارەتی دارایی هەرێم: ئامادەکردنی پشکی هەرێم بۆ بودجەی فیدراڵی ٢٠٢٧ کۆتایی هات
پاش زیاتر لە مانگێک لە گفتوگۆی چڕ و خەمڵاندنی هەمەلایەنە، وەزارەتی دارایی و ئابووریی حکومەتی هەرێمی کوردستان کۆتاییهاتنی پرۆسەی ئامادەکردنی پشکی هەرێمی بۆ پڕۆژە یاسای بودجەی فیدراڵی ٢٠٢٧ ڕاگەیاند و پڕۆژەکەی بە هەردوو شێوازی کاغەزی و ئەلیکترۆنی ڕەوانەی وەزارەتی داراییی فیدراڵ لە بەغداد کرد.
ئاوات جەناب نووری، وەزیری دارایی و ئابووری، سوپاس و دەستخۆشیی ئاراستەی سەرجەم ئەندامانی لیژنەکە و ستافی بەڕێوەبەرایەتیی گشتیی بودجە کرد، هەروەها سوپاسی هەماهەنگییەکانی دیوانی ئەنجومەنی وەزیران و لایەنە پەیوەندیدارەکانی حکومەتی فیدراڵی کرد بۆ سەرخستنی ئەم ئەرکە لەگەڵ سیستمی ئەلیکترۆنیی بودجەی عێراقدا.
گرنگترین خاڵەکانی پڕۆژەکەی هەرێمی کوردستان:
مووچە: دابینکردنی تەواوی مووچەی فەرمانبەران، خانەنشینان، کەمئەندامانی سەنگەر، زیندانیانی سیاسی و بنەماڵەی شەهیدان.
هاوتاکردن: هاوتاکردنی مووچەی پێشمەرگە، خانەنشینان و خاوەن پێداویستییە تایبەتەکان لەگەڵ بەغدا، لەگەڵ وەرگرتنی شایستە داراییە پێشووەکان.
مافە کارگێڕییەکان: جێگیرکردنی مافی پلەبەرزکردنەوەی فەرمانبەران، بەهەمیشەییکردنی فەرمانبەرانی گرێبەست، و چارەسەرکردنی کێشەی ئەو فەرمانبەرانەی لە سیستمی (UPN) تۆمار نەکراون.
تەندروستی و خزمەتگوزاری: دابینکردنی خەرجییەکانی دەرمان و پێداویستییە تەندروستییەکان، لەگەڵ تەرخانکردنی بودجەی وەبەرهێنان بۆ پڕۆژە خزمەتگوزارییەکان.
دامەزراندن: دامەزراندنی سێ یەکەمەکان، خاوەن بڕوانامە باڵاکان، پزیشکانی گشتی و ددان، دەرمانساز و هاوپیشە تەندروستییەکان.
وەزارەتی دارایی و ئابووری جەخت دەکاتەوە کە ئەم ئامادەکارییە وردە دەبێتە بنەمایەکی بەهێز بۆ چارەسەرکردنی بنەڕەتیی کێشە داراییەکان. هاوکات داوا لە فراکسیۆنە کوردستانییەکان لە ئەنجومەنی نوێنەرانی عێراق دەکات بە یەکدەنگی و هاوهەڵوێستی داکۆکی لەم پشکانە بکەن تاوەکو لە کاتی گفتوگۆکانی پەرلەماندا لە یاسای بودجەدا جێگیر دەبن.
